Англиянинг "Ньюкасл" клуби дарвозабони Тим Крулга премьер-лиганинг бир қатор грандлари оғиз сола бошлагани ҳақида маълумотлар кўпайган. 23 ёшли голландиялик дарвозабонга "Челси" ҳамда "Тоттенхэм" жиддий қизиқиш билдирмоқда, дейди Premiership.ru сайти.
"Тим Крул ҳозирги кунда Премьер-лиганинг энг кучли дарвозабонларидан бирига айланди. Унга кўп жамоалардан жиддий таклифлар тушмоқда. Агар қандайдир жамоага бундай юқори савияли дарвозабон керак бўлса, унинг бозори ҳам шунга яраша бўлади. Тим Крулнинг ҳозирги баҳоси 15 миллион евро, балки ундан ҳам кўпроқдир. Биз агар Крулни сотадиган бўлсак, айнан мана шу нарҳдан камига сотмаймиз",- дейди, "Ньюкасл" клуби расмий вакили The Sun нашрига берган интервьюсида.
Эслатиб ўтамиз, Тим Крул премьер-лига расмий сайтида ўтказилган сўровномада, биринчи давра якунларига кўра Англия премьер-лигасининг энг яхши дарвозабони сифатида, рамзий терма жамоадан ўрин олган.
